【娛樂新聞】《璀璨之城》陳瀅全裸上陣誘惑張智霖 晒白滑美背蜜桃臀 親解大膽除衫戲：並非賣弄性感.熱播中嘅《璀璨之城》今晚（15日）一集，由陳瀅飾演嘅記者霍佩樺（Sarah），為了與官孝賢（張智霖飾）達成合作，竟然在對方面前脫得一絲不掛，大膽露背兼大騷「蜜桃臀」，極致誘惑嘅場面絕對令觀眾睇到嘩嘩聲。

劇情講述，孝賢到秘密情人Annie（陳曉華飾）嘅辦公室交代地下情，並欲尋回Annie嘅手機。其後孝賢找霍佩樺Sarah私下對話，孝賢先試探對方：「你認為自己係唔係Annie最信任嘅人？佢有冇留低啲乜嘢畀你呀？」Sarah主動出擊挑逗孝賢說：「我覺得我哋可以合作，Annie做到嘅嘢，我都做到。」向來疑心極重嘅孝賢雖然覺得對方有趣，惟需觀察對方：「我哋只係識咗5分鐘，點解我要信你呀？」Sarah對孝賢步步進逼：「你需要嘅係冇感情瓜葛，純粹利益交易嘅partner。」

另一場，Sarah與孝賢在Annie家中見面，Sarah交出Annie嘅手機，更向他明言自己很貪，望與對方長期合作。她為了證明自己夠狠且絕對保密，竟然即場寬衣解帶，露出黑色性感內衣，甚至進一步脫得一絲不掛，展現白滑美背揚言：「我講過Annie做到嘅嘢，我都做到，同埋你都見到我唔會錄你音。」養眼度爆燈。

這幕出街後，隨即引起網民洗版式討論，大讚陳瀅身材弗到爆，更練出完美「蜜桃臀」吸睛十足，紛紛留言：「呢場真係睇到嘩一聲」、「陳瀅今次去到好盡，呢個角色一定唔簡單」、「阿瀅身材勁Fit呀！」

談到這幕引起極大迴響嘅大膽除衫戲，陳瀅接受訪問時透露，當監製陳維冠與其傾劇本時已十分喜歡這個故事，收到劇本看到這場戲更馬上傳短訊給對方：「初頭佢話放心好簡單，一個back shot 上半身除衫露個背就得。但我覺得呢場戲可以拍得更深入同大膽，出嚟效果會更好。」她認為這場戲並非單純賣弄性感，而是展現Sarah嘅極大犧牲與深層故事，絕對值得拍得更Iconic。

首次拍攝如此大膽嘅戲份，她坦言難免緊張，更爆出拍攝時嘅驚險趣事：「嗰個Shot係影我要除褲，我記得拍第一個take太緊張，因為條底褲黐住條褲，差啲一嘢除晒，嚇到Camman哥哥勁驚，叫我慢慢嚟。」她又感謝劇組嘅保護與張智霖給予嘅信心，讓她能安心完成拍攝。

陳瀅又大爆為這場戲努力操Fit，花了9個月時間增肌減脂：「嗰段時期我不斷做gym，主打練下半身不停練patpat。因為我一直都冇好自律做gym，但為咗呢個角色我堅持去做，令我養成咗健康嘅生活習慣。」

提到今次首與張智霖合作，她坦言興奮多於緊張，又指二人很快便培養出默契：「記得第一日同佢開工已經好smooth。」陳瀅指兩人在辦公室嘅對手戲，張智霖重新大改劇本：「本來我係冇挑逗佢，係佢加咗啲嘢，令到成件事嘅化學反應同效果更加好。」TVB