TVB「御用二世祖」之稱的劉永健演活過不少惡人角色，貴為劉家榮的兒子、兼已故一代洪拳宗師兼著名工夫片導演劉家良侄仔，本應在娛樂圈發熱發亮，不由於形象被局限，發揮機會不多，他曾自爆不介意做御用壞人，還自爆曾被稱為「TVB有錢仔」及「劉公子」，他表示：「因為我做親啲角色都係二世祖、敗家仔。」他唯一一次不用做奸角，便是於劇隻《雲海玉弓緣》中飾演有潔癖的公子，因此他一直很感激監製張乾文。

劉永健曾為ViuTV節目《友枱VIP》擔任主持，更邀得好友唐文龍擔任嘉賓，二人曾因關係過度密切而傳出斷背緋聞，劉永健表示二人因為齊齊拍攝無綫劇集《十月初五的月光》而成為好友，他試過經濟拮据的時候，唐文龍為了照顧其男人自尊心，就以健身為藉口，叫他到家中拎健身奶粉，他一揭開奶粉蓋發現裏邊有二萬蚊人民幣，他心裏很感激，永遠都感謝這位好友曾助他渡過難關。劉永健又解釋二人「斷背」傳聞，他表示當日被傳媒拍到二人同行逛超級市場，只是因為他當時想指導唐文龍浪漫一點，有助日後追女仔之用。當時報道一出，唐文龍即收到父母由美國打來的長途電話，還解釋了好久，父母才放心下來。

劉永健貴為劉家榮的兒子及劉家良姪仔，他坦言有靠家人入行：「我本來入電影圈，喺加拿大返嚟，當時係電影最差嘅一年，95、96年，匯川被迫停產解散，我一入行就失業。」之後他在貿易發展局做了一年兼職，有次跟爸爸參加慈善保齡球賽，樣子見報後，樓南光就向高層介紹他入無綫。劉永健透露試鏡時華星唱片公司宣傳部有人邀請他參加新秀：「我鍾意唱歌㗎，但佢話當晚就截止報名，叫我即刻考慮。我話我跟咗佢走就冇得試鏡，都係做番做緊嘅嘢好啦。」結果該屆由陳奕迅贏得冠軍，劉永健笑言：「就算我參加咗，個結果都冇可能改寫。」

近年已甚少在幕前演出的他，已轉戰到內地發展飲食業，不時活躍於社交平台分享生活點滴。他曾試過拍片呻老闆唔易做，遭員工當面發脾氣兼劈炮。日前，他又拍片怒轟銀行，爆粗狂轟銀行職員。事緣他的銀行卡到期故到銀行更換，辦理期間女職員要求他核對當初登記的英文地址，但劉永健表示因早已搬遷，未能提供完整的舊地址，被女職員以「系統資料必需一字不差」為由拒絕。雖然劉永健表示可提供身份證亦不得要領。怒火中燒的劉永健表示：「有好多人話香港服務態度唔好，香港落後，我親身感受到。我去台灣，我敢講全中國，台灣質素係最好。」結果片段引爆熱議。

劉永健炮轟銀行女職員不懂變通，「我話我移咗民，唔係喺香港住，冇咗現有嘅地址，佢冇辦法，寄唔到。我話即係冇用啦。我話我張香港身份證嚟做咩？香港身份證係做咩？身份證係要證明你嘅身份啊嘛。原來依家係唔需要睇身份證㗎啦，淨係要你個地址，同埋呢一位女職員係完全冇諗過點樣去幫呢一位客人去解決問題。」後來有另一位男職員接待：「呢位男職員嘅態度好好，佢真係好用心去幫助我點樣去解決到呢個問題，但係冇辦法，你嘅銀行制度就係咁，冇得變。」影片在網上瘋傳，劉永健遭一面倒網民狠批，最後劉永健急急將影片下架刪PO。