▪️經歷180分鐘62次攻門零入球嘅尷尬之後，土耳其喺已經出局嘅情況下反而踢得更好，效率更高。

美國可以盡踢風流波下，派遣唔少後備上陣，早前提及過嘅兩位焦點人物- 「神童」雷拿（Giovanni Reyna）以及名將之後嘅貝荷達（Sebastian Berhalter）皆以主力身份登場。後者喺比賽初段貢獻一個助攻一個入球，演繹甚為精彩！反觀雷拿喺下半場普列錫（Christian Pulisic）後備上陣之後，於進攻左路嘅串聯先見明顯嘅化學作用，相信日後普捷天奴喺呢個點可以有繼續深挖嘅空間。左閘查斯迪（Auston Trusty）喺角球方面似乎有比較獨特嘅理解，除咗開場嘅入波之外，還有一次頭槌幾乎可以擴大比數。另外值得一提嘅係，麥堅尼（Weston McKennie）絕對係今屆美國嘅最大收穫，除咗覆蓋面積廣，佢嘅組織以及遠射都係球隊所需要嘅元素。

土耳其收起部份主力之後，反而有唔錯嘅效果，特別係球隊放棄控球採取更講求效率嘅反擊。居拿（Arda Güler）移居中路，實際依然喺右路活躍，佢同艾甸（Oğuz Aydın）幾乎策動咗球隊60%以上嘅嘅攻勢，相反左側嘅耶迪斯（Kenan Yıldız）還係相對較「靜」；耶瑪斯（Baris Alper Yilmaz）推前一格踢中鋒位置，還尾段完全適應，不過追和比數嘅入波都相當重要；後備入替嘅中堅艾漢（Kaan Ayhan）就應該好難相信幸福會來得如此突然。守門員卡卻（Uğurcan Çakır）有精彩嘅極限撲救，但係兩次被射穿嘅失球都係喺近柱位，呢個就需要注意嘞。

*美國晉級之後，對手將會係來自B組第三名嘅波斯尼亞。

▪️對美國踢442，對土耳其踢4231，踢澳大利亞就541，艾法路每一場都求變，而巴拉圭態度好明確，寧願守和都唔可以失分，都深知自己淨勝球劣勢冇咩甜頭可以排得更前位置（最佳分組第三名排名）。由於艾美朗（Miguel Almirón）「衰多手」停賽，故今仗恩斯素（Julio Enciso）退後一格踢左中場，單箭頭都由亞華路斯（Gabriel Ávalos）取代沙拿比亞（Antonio Sanabria），而呢套陣容陣式喺半場過後就再次調整番去熟悉嘅442。恩斯素退居左路效果並唔係太合適，亦都喺踢番雙箭頭之後有明顯嘅改善。後備入替嘅莫利素（Maurício Magalhães Prado）就成為全隊唯獨兩次埋門都命中目標嘅球員，奈何受制於澳大利亞嘅防守壓力就未能締造威脅。

澳大利亞方面都有調整，伊蘭昆達（Nestory Irankunda）重返主力陣容，但係對著巴拉圭嘅密集防守就唔係咁多亮點；左路嘅保斯（Jordan Bos）係「袋鼠軍團」最活躍嘅其中一位，帶動進攻威脅亦都最多。艾雲尼（Jackson Irvine）有幾下粗野嘅攔截，收到黃牌都算合理；踢足90分鐘嘅奧尼爾（Aiden O'Neill）傳統成功率去到八成三，單挑成功率都去到接近六成，更加有5次成功攔截，賽後都會選最佳球員。

老鼠拉龜嘅防守大戰以互交白卷作結，各取所需嘅一分，都算係唯美嘅結局。澳大利亞篤定晉級，巴拉圭雖然要等一等，不過前景都非常可觀。

世界盃分組賽賽事賽果-土耳其🇹🇷3-2🇺🇸美國巴拉圭🇵🇾0-0🇦🇺澳大利亞

*附D組分組積分排名，另外三十二強目前已經確定19席，分別係：墨西哥、美國、德國、阿根廷、法國、挪威、哥倫比亞、瑞士、加拿大、巴西、摩洛哥、波斯尼亞、南非、科特迪瓦、厄瓜多爾、荷蘭、日本、瑞典以及澳大利亞。

世界杯世界盃分組賽FIFA World Cup 2026 🇺🇸🇨🇦🇲🇽土耳其球迷俱乐部美国球迷俱乐部巴拉圭球迷俱乐部澳大利亚球迷俱乐部