▪️比賽過程向來都最怕球證「搶鏡」，來自美國嘅女球證瑪莉彭素（Mary Victoria Penso）今日凌晨就成為咗焦點。除咗係今屆賽事第二位女球證執法之外，佢喺厄瓜多爾對陣德國裡面嘅幾次判罰都極具爭議，包括辛尼（Leroy Sané）打開紀錄嘅一球之前，柏夫洛域（Aleksandar Pavlović）舉腳過高踢中維迪（Pedro Vite）而未有吹罰；再者軒卡彼耶（Piero Hincapié）禁區內被辛尼推跌未有吹十二碼；同埋全場最大爭論嘅夏維斯果球十二碼被VAR推翻（喺反擊中辛尼喺中場踢跌維迪犯規在先）。

厄瓜多爾分組賽累計第36次攻門終於由中場嘅安古路（Nilson Angulo）打開缺口；維迪成為今場嘅焦點人物，兩次嘅爭議判罰都係同佢有關，另一位就係來自對手嘅利萊辛尼；柏達（Gonzalo Plata）三場分組賽累計8次攻門亦總算取得個人今屆第一個入波。厄瓜多爾前兩戰零入球得一分，最終回取勝獲得最佳分組第三晉級資格，夠曬熱血！

德國以「孚添」出戰，整體發揮都係麻麻。利萊辛尼過多於功，淘汰賽需要多加注意；紐亞（Manuel Neuer）面對第二個失球嘅反應同溝通，需要負上責任；再以後備身份上陣嘅恩達夫（Deniz Undav）未能延續入球運氣，分組賽總入球數維持喺3粒。德國連續三屆世界盃分組賽都有最少一場輸波，2018年0-1不敵墨西哥以及0-2不敵南韓；2022年1-2不敵日本以及0-1不敵西班牙。今次係佢哋事隔12年首次晉級淘汰賽階段。

▪️庫拉索喺上一仗守和厄瓜多爾之後，今仗嘅寄望係可以攻入隊史第一個入波。睇得出佢哋嘅進取心都幾足，開波第一時間搶攻，以及球員比較多嘗試喺禁區外遠射，包括加利（Jurien Gaari）嘅重砲同埋下半場尾段奴斯連（Tyrese Noslin）嘅長距離笠射。守門員隆姆（Eloy Room）依然有穩健嘅把關，整體來講都值得給予掌聲。

科特迪瓦變陣442，演繹都更有耐性同成熟。柏比（Nicolas Pépé）成為贏波英雄，其中第二粒入波前鏡頭有所交代嘅連續十腳傳送團體配合尤為精彩！繼續擔任隊長嘅基斯（Franck Kessié）踢咗76分鐘，有一腳相當近磅嘅埋門，表現就不及拍檔辛加利（Ibrahim Sangaré）；迪奧文迪（Yan Diomande）依然係科特迪瓦最具威脅嘅一位。

世界盃分組賽事賽果-Group E厄瓜多爾🇪🇨2-1🇩🇪德國庫拉索🇨🇼0-2🇨🇮科特迪瓦

*附E組分組積分排名

世界杯FIFA World Cup 2026 🇺🇸🇨🇦🇲🇽世界盃分組賽厄瓜多尔球迷俱乐部科特迪瓦球迷俱乐部