《魔音女團》6人正式成團 6月6日出道.由蕭正楠主持嘅TVB綜藝真人騷《魔音女團》昨晚（15日）圓滿結束，經過「終極考試」同評審激烈辯論後，最終6名成員正式誕生，包括喬美莎（Chelsea）、倪樂琳（Ellyn）、倪嘉雯（Carmen）、盧映彤（Skylar）、宋宛穎（Sabrina）及莊子璇（Hilary）。6人獲校董鄔友正頒發10萬港元獎金，蕭正楠更即場宣布佢哋將於6月6日晚播出嘅《萬眾同心公益金》中正式出道。

宣布機制近似「二揀一」，所以當選嘅成員大都表現激動，Chelsea、Ellyn同Skylar更加係爆喊。製作組仲安排感情要好嘅Carmen同Skylar同組，當阿蕭讀出Carmen個名時，兩人都有啲茫然；到宣布Skylar都當選時，兩位好姊妹即刻興奮熊抱，其他團員都一擁而上，場面感人。據知，俞可程、鄧凱文、廖慧儀一度係入圍考慮之列，雖敗猶榮。

6位魔音女團正密鑼緊鼓籌備出道歌〈Turn My Magic On〉，由張與辰作曲、T-Rexx填詞，喺昨晚節目尾聲曝光錄音同準備情況，令人期待。TVB