首回合2-2打和，次回合球證嘅個別判罰又有爭議，估唔到會咁多小插曲。

半場雙方埋門機會唔多，亞特蘭大明顯更加主動，拉素就縮得比較後天。換邊之後中段開始越來越多「埋牙」，先有艾達臣嘅入波被推翻，原本拉素守衛基拿（Mario Gila）疑似手球情況下，守門員莫達（Edoardo Motta）落地「擒波」被卡斯杜域「篤走」，艾達臣快腳射入，但係就遭到VAR裁定犯規在先，相反基拿嘅手球就被判無事，場面都幾混亂。球隊右路進攻更具威脅，迪卡特萊爾同比蘭路華嘅串聯做得幾好。柏薩歷（Mario Pašalić）後備入替射入至關重要嘅續命入波，係整場賽事表現最好嘅一位；拉斯柏杜尼加時階段嘅入波再被VAR以越位在先為由推翻，對亞特蘭大影響頗大。

羅馬洛尼（Alessio Romagnoli）頂開迪真斯堤（Berat Djimsiti）成功「偷雞」盡現經驗嘅老到；莫達作出嘅極限撲救令史卡麥卡與絕殺失之交臂，而呢位年僅21歲嘅意大利本土守門員喺其後嘅十二碼決勝除咗拉斯柏杜尼嘅主射之外，其餘全數被佢撲出，往後嘅發展值得留意。

淘汰亞特蘭大晉身決賽嘅拉素，決賽會對陣班霸國際米蘭。拉素對上一次奪標喺2018/19球季，當時嘅對手正正係尋晚被擊敗嘅亞特蘭大。

Coppa Italia 🇮🇹🏆拉素